جرافيتى من تصميم omar_hishaam@

احمد عبد الكريم -- معتقل السفارة الاسرائيلية

أنا هحكى القصه اللي حصلت لأحمد عبدالكريم كما حكاها لأهله عندما زاروه

احمد قال:

انا كنت واقف علي الكوبري منتظر واحد صاحبي ولقيت واحد متصاب فكنا بنشيله على جنب وكان قدامنا ظابط وعسكري بس كانو لبسين لبس مدنى بس فى مسافة بعيدة شوية وكان هينزل عليهم طوب من فوق فبشاورلهم بأيدي عشان الطوب ميجيش عليهم وبقولوهم حاسب خدو جنب فالظابط مسمعنيش ففكرنى بزعق فيهم عشان أصابوا إلى إحنا كنا بنشيله فضايق جدا وضرب عليا بالنار في نفس الوقت اللي قال لعساكره هاتولي ابن**** ومسمحليش حتي افهمو انا كنت بقول ايه

انا مش عارف انا عايش ازاي لحد دلوقتى .انا الرصاص كان بيعدي جنب كتفي ومن فوقي (يعني احمد كان زمانه ميت ومحدش يعرف الحقيقه والناس كلها فكراه بلطجى)

وبعدين اتجمع عليا حوالى 20 او25 عسكري وضربوني ضرب مووت في كل جزء في جسمي وبعدين جروني للعربيه(البوكس) وهما بردو مستمرين في ضربي والمسافه كانت كبيره جدا غير ان كل واحد في السكه تبعهم كان بيساعدهم في ضربي(زي مايكون 25 عسكري مش كفايه لمووت احمد مع العلم ان احمد كان عنده حمى يعني حتى المقاومه هتبقي قليله)

وبعدين سرقونى وخدو فلوسى وموبايلي ونظارتى وكل حاجه كانت معايا وخدونى علي القسم ولفقولي تهم كتير

(وبعدين صوروهم بعد الضرب صور غريبه جدا عشاهم يخلو شكلهم شكل مجرمين فعلا والناس تنساهم وتفتكرهم بلطجيه ومتساعدهمش ومتتعاطفش معاهم انا واحد من الناس لو معرفش احمد كويس جدا وشوفت صورته في التلفزيون انا كنت قولت ده شكله فعلا بلطجى ويستاهل وانا قولت فعلا ان احمد بس اللي مش بلطجى بس الباقيين بلطجيه يس للأسف والد احمد قال انهم شافو حالات كتير زى احمد واكتر يا ريت الناس متتخدعش في الصور زى ومتظلمش حد للأن الدنيا دى يوم ليك ويوم عليك وربنا اكبر من الكل وياريت الناس تقارن بين صور وتاريخ احمد قبل القبض عليه وبين صوره واللي بيتقال عنه بعد اعتقاله بالدخول علي صفحه "الحرية لأحمد عبد الكريم" علي الفيس بوك والناس هتتأكد من الكلام ده)

وبعدين اتحولت لسجن طره واتعاملت معامله المجرمين حلقولي شعري زيرو ولبسوني لبس المساجين وحطونى في زنزانه مع 13 واحد مبنخرجش منها خالص بس والله انا الحمد لله متماسك جد غير وبنقرا قران وبنصلي جماعه وبندعي ربنا يفك كربنا (والواضح إن مش احمد بس المظلوم لأن والد احمد بيقول لما دخل يقابل احمد كان كل المعتقلين واهلهم في غرفه صغيره معاهم وجد شاب صغير معملش برده حاجه بس للأسف مش متماسك زى احمد واول ما شاف اهله انهار في البكاء واهله مش عارفين يسكتوه فوالد احمد قاله. "اسكت متبكيش انتو رجاله ومظلومين وربنا كبير ومش هيسيبكو" )

وده اللي حكاه احمد.

يا مصريين أنا عاوز كل واحد قبل ما يقول رأيه يحط نفسه مكان أحمد .... إن هو كان ماشي فى الشارع وأتضرب وأتسحل ... وأتلفقتله تهمه وإتقال عليه بلطجى ....... لو ترضي يتعمل فيك كده أسكت على حق أحمد وأوعى تتكلم تانى طول عمرك ........

من كلام احمد

==================
أحمد محمود محمد عبدالكريم
شاب مصري ثوري ناشط سياسي من أسيوط
شارك ف الثورة منذ إندلاعها و حارب الفساد بعد إنتهاء الثورة
حتى شاء الأقدار و تم القبض عليه ظلما من قبل الشرطة العسكرية في يوم 9/9/2011 من فوق الكبري وتم تلفيق القضية على إنه أتمسك من أمام المديرية
أحمد إتعرض على نيابة س28 نيابات الحى العاشر يوم السبت يوم 10 / 9
وللأسف هو واللي معاه أخدوا خمستاشر يوم على ذمة التحقيق !!!
وهما دلوقتى فى طره !
محتاجين دعائكوا ومحتاجين همتكوا معانا ف النشر أحمد مش بلطجى ولا عمره أذي حد
أحمد سافر عشان يطالب بحقه مع أخواته وياريت قبل ما أحد يقول رأيه يحط نفسه مكان أحمد وبعد كده يقول إلى عاوزه
أحمد خريج كلية تربية
أحمد كاتب وشاعر
أحمد عضو فى إئتلاف شباب الثورة - أسيوط
أحمد كان شعارة دايما السلمية
لما كان حد من إصحابه بيتخانق فى المظاهرة بيوقف ويقولهم لأ إنتوا كده بتخلوا الناس ياخدوا فكرة وحشة عن شباب الثورة
وكانت النتيجة إنوا يتحبس بتهمة التخريب !!!!!!!!!!

عاطف يحيى ---شهيد السفارة الاسرائيلية - اللى حقه ضاع

عاطف يحيى توفاه الله يوم 1-11-2011 ، بعد ما اصيب برصاصة فى تظاهرات السفارة الاسرائيلية يوم 27 مايو

واهله اضطروا يوقعوا على سبب الوفاة انه طبيعى نتيجة انسداد الفصبة الهوائية والرصاصة اللى اخترقت مخه اختفت بعد ما سببت تلف لاجزاء من المخ ودخوله فى غيبوبة ، يعنى شهيد حقه ضايع