قهر الحيطان

لانى مش عارفة ابدأ منين ومئات الافكار تتصارع فى رأسى ،هاكتب ما يأتى فى خاطرى مباشرة .

منذ لحظة الميلاد ،وكل اشكال التمييز العنصرى تمارس ضد المرأة فى بلادنا ،حين ينبأ الاب بأن المولودة انثى ،تتفاوت ردود الافعال ،منهم من يدعى ايمانه بالله ويقول كل اللى يجيبه ربنا كويس وتتدرج ردرود الافعال احيانا لدرجة تطليق الزوجة كما لو انها المسئولة عن تحديد نوع المولود ،نعم مازالت تحدث مثل تلك الاحداث فى بلادنا.

ثم نمر بمرحلة التمييز فى الطفولة ،والبنت مش زى الولد ،حتى فى مصروف المدرسة احيانا ،ببساطة علشان هى بنت . وتبدا الصدمة الاولى فى حياة الانثى بعملية الختان ، تلك العملية التى لا ادرى من العبقرى الذى ابتدعها والتى مازال البعض ينسبها للدين ،اى دين ؟

ان الرسول لم يختن بناته ،فكن هن اولى بتطبيق هذا الدين !!!!!

ما الحكمة من ازالة مراكز هامة للاحساس الجنسى من جسد البنت ؟ لحمايتها ؟ من من ؟ من اى شئ ؟

وهنا تبدأ ارساء جذور كارثة اكبر لتكبر الفتاة محرومة من مراكز الاحساس الجنسية التى يمكن ان تشعرها بالمتعة عند ممارسة العملية الجنسية الطبيعية ، وتصبح العملية الجنسية مهمة "ألم" أكثر منها مهمة "متعة" وتتهم  حينها بالبرود الجنسى وعدم الاستجابة.

الاجزاء المقتطعة او المجزورة من العضو التناسلى او الجنسى تلعب دور اساسى فى بداية شعور المرأة بالمتعة الجنسية ، اذا كانت محفزات الاحساس غير موجودة ،فكيف تتوقع ان تكون الاستجابة؟

الكثير من صديقاتى المتزوجات يعتبرن اليوم الذى يقمن فيه بالتبادل الجنسى مع ازواجهن هو عملية تعذيب ! لقدأصبح الجنس الذى خلقه الله فى البشر جميعا للاحساس بالمتعة وعمل توازن هرمونى فى الجسم والحفاظ على استمرارية البشرية ،اصبح عملية تعذيب . ليه؟ علشان عادات وموروثات جاهلية تطالب بختان البنات للحفاظ على عفتهن !!!!!!

وتأتى بعد ذلك مجموعة من العقوبات والمفاهيم التى تمارس على الفتاة لمجرد ان ربنا خلقها بنت !

البنت دايما هى اللى غلطانة ،اذا تعرضت للاغتصاب تبقى هى اللى شجعت على ده أو هى ليه بتمشى لوحدها فى وقت متأخر او ايه اللى وداها المكان ده ؟ ومش بعيدة هى اللى تتعاقب وتتقتل – الضحية – لانها أغتصبت او تمضى ما تبقى من عمرها وتحوطها نظرات الشك والغمز واللمز وان كانت متزوجة ،ههتطلق بنسبة 90 % ، وتمنع من الابلاغ عن الحادث ، حيث لا يتم الابلاغ عن حوادث الاغتصاب فى معظم الحوادث منعا للفضيحة غير مباليين للايذاء النفسى والجسدى الواقع على الضحية ،دا اذا اعتبرها المجتمع ضحية .

واذا انتقلنا الى ممارسات اخف من الاغتصاب وهى التحرش الجنسى بكل انواعة بدءا من الكلمات ذات الايحاءات الجنسية او الصريحة جنسيا حتى الملامسات الجسدية ومحاولة امساك جزء من جسد الفتاة ، فنجد اللوم ايضا يقع على الفتاة ، فمرة لانها تمشى بطريقة مغرية او ملابسها غير مناسبة ،وتيجى تسمع من بتوع الدين اللى هم كلهم ذكور احلى كلام عن الحجاب والنقاب واللبس الخليع وان الشباب معذور من اللى بيشوفه يا عينى .

كأننا حيوانات عايشين فى غابة تحكمهم غرائزهم الجنسية ،وان الدين يجب ان يطبق على المرأة فقط ،وان المرأة خلقت فقط لاثارة غرائز الشباب .

جاتكم ستين نيلة ،مجتمع ذكورى لا يفكر الا فى نصفه الاسفل ووظف الدين فقط لارضاء غرائزه الجنسية .

70% من فتاوى المشايخ تخص المرأة ،بقولكم روحوا اتعالجوا نفسيا أولا من عقدكم الجنسية وبعدين تعالوا اتكلموا فى الدين وتطبيقه على المرأة ،وكل واحد يقول ان المرأه هى السبب فى اشعال الغرائز كمبرر للتحرش بها ،بقولك انت عندك نقص فى احساسك بقوتك الجنسية ،دا اذا مكانش عندك عقدة جنسية فعلا.

مش هاغطى جسمى وامشى لابسة حبل غسيل كامل لارضاء عقدك الجنسية واحساسك بالدونية . ولو انت رجل فعلا كلمنى عقل لعقل . وانسى حكاية ناقصات عقل ودين علشان مش معترفة بها أساسا وان كان عاجبك . وان كانت النساء لا تصلى لعدة ايام علشان دورتها الشهرية ،وانت شايف ده نقص فيها ،يبقى انت بتعيب فى اللى خلقها مش فيها ،روح بقى اتفاهم مع ربنا لو عندك الشجاعة.

العلم الحديث اثبت بالدليل العلمى ان مخ المرأة اكثر كفاءة بعشرات المرات من مخ الرجل لان مخ المرأة توجد به موصلات عصبية بين فصى المخ الايمن والايسر ،بينما مخ الرجل لا توجد به تلك الموصلات وعليه فان عقل الرجل وطريقة تفكيره تسمى التفكير الخطى ،يعنى مايقدرش يفكر فى اكتر من شئ فى ٌُ؛آن واحد دا اذا كان بيفكر اصلا، بينما عقل المرأة قادر على التعامل مع عدة افكار ومشكلات فى آن واحد . بل ان مخ المرأة ايضا يعمل اثناء النوم ،بمعنى انها لو بتفكر فى مشكلة قبل النوم ،ممكن تصحى الصبح وقد وجدت الحل .

اما جسديا ،فالمرأة عندها قوة تحمل تفوق الرجل عدة مرات ،والقوة الجسدية ليست هى القوة العضلية فالرجل يتمتع بقوة عضلية اكبر من المرأة ،يعنى يشيل حاجة تقيلة ،يزق عربية ..لكن المرأة اقدر على تحمل الألم الجسدى علشان كده هى التى تحمل وتلد ودا ثابت علميا مش جايباه من دماغى .

انا كإمراة لا احتاج حماية رجل ،ماهو انت هتحمينى من مين ؟ لم نفسك انت ! علشان لما تقول ان المرأة محتاجة حماية  من الرجال ،يبقى الغلط فى مجتمع الرجال وأنتم اللى تتعاقبوا ويطبق عليكم الحد ،مش النساء

المرأة انسان كامل وارقى واعقل واقوى من الرجل بمراحل .

دينيا ،ربنا افرد سورة للنساء ، كرم السيدة مريم ،اوصى بها الرسول مرات كثيرة ،والرسول قال خذوا نصف دينكم عن السيدة عائشة ،يعنى ماتحطليش الدين حجة .

يعنى اقدر احكم دولة واكون قاضى وأى وظيفة انا عايزاها لانك كرجل لا تتميز عنى بشئ على اى مستوى.

ومحدش يقوللى  { لن يفلح قوم ولواأمرهم امرأة } . ...علشان الحديث ده ظرفى وفى دول كتير على مر التاريخ حكمت فيها المرأة وكان نجاحها ساحقا ،يعنى يا الحديث غلط ،او سيادتك فاهمه غلط والمشايخ بتوعكم ما يدخلوش ذمتى ببصلة ، علشان كلامهم مش منزل وانا عندى عقل يفكر ويفهم .

واحب اقول للرجالة المتزوجين ،مراتك عايزة منك اشباع عاطفى اولا مش جنسى ، وان مكنتش بتعمل كده ،اعرف انها مش طايقاك حتى لو اظهرت عكس كده ،المرأة بارعة فى تزييف وصولها لحالة الاشباع علشان تخلص منك .

وبمناسبة الزواج ننتكلم عن الطلاق ، الرجل من حقه يطلق زوجته بكلمة ،لكن الست لازم ترفع فى قضايا علشان تخلص من حياتها مع رجل ،انا مش عارفة اى يرجل يرضى على كرامته ان واحدة تعيش معاه وهى مش طايقاه .

الدنيا قامت بعد اقرار قانون الخلع ( دى الحاجة الوحيدة اللى بحب سوزان مبارك عشانها) رغم انه ليه مرجعية دينية وحتى لو ملوش ، من حق  اى امرأة انها تنفصل عن زوجها لمجرد انها مش طايقاه ،بس خلاص .

السيدة التى ذهبت للرسول تطالب بتطليقها من زوجها وقال لها الرسول ردى عليه حديقته ،مكانتش بتشتكى من سوء معاملة او ان جوزها بخيل ،عارفين كانت عايزة تطلق ليه ، لانها شافته راجع البيت وسط اصحابه وشافت اصحابه اكثر رجولة منه ،من الاخر ،شافت جوزها اى كلام مقارنة باصحابه ، وصرحت للرسول بهذا ولم يتهمها الرسول بانها عاهرة  او انها ست عنيها فارغة يا مشايخ الظلام .

اهم نقطة عايزة اقولها هى نظرة المجتمع للبنات فوق الثلاثين اللاتى لم يتزوجن ، عادى ان الرجل لا يتزوج لكن مش عادى ان بنت مش عايزة تتجوز علشان مشافتش لسه بنى ادم بيفهم ، ايوة فى بنات كتير مجوزوش مش علشان حاجة الا انهم مش عايزين جوازة والسلام ،فيها حاجة دى ؟

كل فتاة ذات شخصية قوية لا تريد الزواج من اجل الزواج فقط ، نعم وجود الرجل مهم فى حياة المرأة ،ولكن اى رجل ؟

نحن فى مجتمع يعتبر الفتاة ذات الشخصية القوية المثقفة انها معقدة ، ازاى معرفش ؟ هاقولكم دا من خيبة الرجالة ،لان الرجل فى مجتمعنا لا يستوعب الفتاة التى ترد عليه بالعقل والحجة وممكن تشتمه كمان شتايم قبيحة زى هو مابيشتم ، لانه حاطط رجولته فى صوته العالى ونصفه الاسفل فقط ، ، لكن لا شخصية ولا علم ولا ثقافة فهو يخاف الفتاة القوية واذا تشجع وارتبط بها ، بيطلع كل عقده النفسية عليها بمختلف الطرق .

عندى بقى سؤال ،ليه الرجل لو عمل علاقات جنسية بدون زواج يبقى عادى ويفتخر بده ولو البنت عملت علاقة واحدة بدون زواج تبقى عاهرة وبنت كلب ؟ رغم ان الحكم الدينى واحد ، ليه العاهرات هن اللى بيتقبض عليهم ويخلى سبيل الرجل ،رغم ان كل الدول المتحضرة بتحاسب الرجل بتهمة استغلال جسد المرأة فى مقابل مادى حتى لو هى اللى عرضت عليه.؟

ليه لما سيادتك تدخن سيجارة تبقى راجل وانا لو دخنت تبقى مشكلة ؟ مش بدافع عن التدخين ،بس بدافع عن حقى زيى ،زيك ،لو انا ممنوع ادخن ،يبقى انت كمان ممنوع تدخن .

ليه سيادتك عادى تسهر خارج البيت حتى الفجر ،ولو بنت سهرت للساعة 12 ،تبقى مش متربية وملهاش اهل يلموها؟

عزيزى الرجل ، انا فتاة ،مخلوق كامل ، جعلنى الله وسيلة من وسائل خلقه ،كرمتنى الحضارات القديمة بانها جعلتنى نصف اله نظرا لدورى فى عملية الخلق  ،بقولك ان لى  كافة الحقوق مثلك تماما حقوقى الاجتماعية والجنسية والسياسية والمالية.

ليس لك على ولاية او حكم .

ضل راجل ولا ضل حيطة دا حوار تم اختراعه من مجتمع ذكورى يريد ان يلغى نصف المجتمع . تفضل الحيطة على دماغ البنت بداية من الاب ،ثم الاخ ،الزوج وبعد كده الابناء الذكور لما يكبروا . لأ،،،،،،  الحيطة افضل ،ولو مفيش حيطة برضو مش مهم .

اذا كانت المرأة تحتاج الرجل فهى تحتاجه كما قالت الحكمة الالهية ،للسكن والمودة والرحمة ،اكتر من كده مفيش ، حتى الجنس مش محتاجينه منكم ، لانى كما ذكرت سابقا المرأة تحتاج الرجل عاطفيا اكثر منه جنسيا .

لو مستعد انك تكون رجل بناءا على قيمتك كشخص ،على عينى وراسى ،لكن لا اعترف بالرجل لان تصنيفه البيولوجى "ذكر " ،فى فرق بين ذكر ورجل .

ملحوظة : مش بفرح لما توصفنى انى بنت ب100 راجل ،لانى فخورة بكونى امرأة