زرع حصد قتل - فى زكرى بحر البقر

ز....ر....ع
زرع
ح....ص....د
حصد
ق....ت....ل
قتل
ق ت ل !!!
الدرس انتهى
لموا الكراريس
بالدم اللى على ورقهم سـال ....* فى قصـر الأمم المتــحدة
مسـابقة لرسـوم الأطـفال ....* ايه رأيك فى البقع الحمـرا
يا ضمير العالم يا عزيزى ....* دي لطفلة فلسطينيه وسمرا
كانت من أشـطر تلاميذى ....* دمها راسم زهره
راسم رايـة ثورة ....* راسم وجه مؤامرة
راسم خلق جبار ....* راسم نـار
راسم عار ....* ع الصهيونية والاستعمار
والدنيا اللى عليهم صابرة ....* وساكتة على فعل الأباليس
الدرس انتـهى
لموا الكراريس
ز....ر....ع
زرع
ح....ص....د
حصد
ق....ت....ل
قتل
ق ت ل !!!
ايه رأى رجـال الفكر الحر ....* في الفكرة دي المنقوشة بالدم
من طفل فقير مولود فى المر ....* لكن كان حلو ضحوك الفـم
دم الطـفل الفـلاح ....* راسم شمس الصباح
راسم شـجرة تفاح ....* في جناين الاصلاح
راسم تمساح ....* بألف جناح
في دنيا مليانة بالأشبـاح ....* لكنـها قلـبها مرتــاح
وساكتة على فعل الأباليس
الدرس انتـهى
لموا الكراريس
ز....ر....ع
زرع
ح....ص....د
حصد
ق....ت....ل
قتل
ق ت ل !!!
ايه رأيك يا شعب يا عربي ؟ ....* ايه رأيك يا شعب الأحـرار ؟
دم الأطـفال جايلك يحـبى ....* يقول انتـقموا من الأشـرار
ويسيل ع الأوراق ....* يتهجى الأسـماء
ويطـالب الآبـاء ....* بالثـأر للأبـناء
ويرسم سيف ....* يهـــــــدّ الزيـف
ويلمع لمعة شمـس الصيف ....* في دنيا فيها النور بقى طيف
وساكتة على فعل الأباليـس
ز....ر....ع
زرع
ح....ص....د
حصد
ق....ت....ل
قتل
ق ت ل !!!
الدرس انتهى
لموا الكراريس


الراحل صلاح جاهين