مطالب ثورية لكسب دعم الشارع

1- المطالب الاجتماعية :
اهم ما يمس المواطن العادى هى العدالة الاجتماعية ،بس لازم نقولهاله بشكل بسيط ،يعنى نقول له مش معقول واحد مرتبه 2 مليون جنيه وواحد مرتبه 700 جنيه حتى مع اختلاف المؤهلات والمواقع والوظائف ،لازم نكلم رجل الشارع بطريقة بسيطة علشان يقتنع
بص يا عم احنا عايزين اقل حد للاجور 1500 جنيه مع الزيادة المستمرة سنويا بما لايقل عن 30 %


التأمينات الاجتماعية والطبية اللى هى مجرد حبر على ورق خصوصا فى القطاع الخاص ،لازم تفعيل التأمينات وتكون على كامل المرتب مش الاساسى وصاحب المنشأة اللى يتهرب من التأمينات يدفع غرامة تقطم وسطه ،مش يظبط موظف التأمينات ب100 جنيه علشان ينكر ان عنده موظفين


التأمينات الطبية يجب ان تشمل كل القطاعات وكل الامراض ماعدا التجميل طبعا ،والزام كل المستشفيات العامة والخاصة بتطبيق نظام التأمين الصحى وحالات الطوارئ تستقبل فى اقرب مستشفى لها والمستشفى اللى ترفض ،تتقفل


2- الاصلاح الادارى:
الفساد الادارى متوغل فى كل شئ بدأ من استخراج بطاقة الرقم القومى الى الافراج عن السلع فى الجمارك والادوية المغشوشة والمهربة ،الرشاوى بتخلص كل حاجة . الجهاز الادارى كله محتاج يتنسف . نزود مرتبات الموظفين علشان اللى ياخد رشوة بغد كده يتسحل


3- اصلاح الداخلية :
الكل بيعانى مع الداخلية ،وانا مش ضد الداخلية ،هم دول اللى لازم تكون مرتباتهم كبيرة مش رؤساء تحرير الصحف بتوع الاعلانات وانا ضد عدد ساعات العمل الطويلة اللى بيشتغلوها ،ريحوهم ويريحوا الشعب ،معاملة ادمية بدءا من الكلمة ،يعنى مفيش قلة ادب ،والبلطجى يتقبض عليه ويتحاكم لكن مايتسحلش فى القسم .
ودى بعض الاقتراحات اللى كنت كتبتها لتطوير الداخلية:


اقترح تركيب كاميرات فى كل الشوارع حتى الجانبية ودا ممكن بالزام كل المحلات التجارية والبنوك والصيدليات وكل واحد فاتح  اى منشأة بتركيب كاميرا وتتخصم تكاليفها من الضرائب اللى عليه

الكاميرات تتوصل بكوبيوترات فى كل منطقة تابعة لوزارة الداخلية متواجد عليها مراقبين 24 ساعة

الخطة دى هتوفر الاتى:

1- مراقبة المرور ومش هنحتاج عساكر وضباط للمرور زى دبى كده واللى هيخالف ،الكاميرا تجيبه وان اعترض تسجيل الكاميرا موجود واتفضل شوف ،وبكدة نقضى على الرشاوى اللى بتدفع لامناء

2- هنقدر نراقب اى جرائم تحصل فى الشارع  سواء من الجمهور او الشرطة وكله هيكون متسجل مع الاخذ فى الاعتبار ان تسجيلات الكاميرات دى يعتبر وثيقة قانونية تاخد بيها المحكمة

3- قوات الشرطة اللى هنوفرها من الشوارع ،هى اللى تدرب على الكومبيوترات دى وتقعد تراقب وبدل وقفتهم فى الشارع هيقعدوا فى مكاتب مكيفة ونزود مرتباتهم شوية علشان نعوضهم عن الرشاوى اللى كانوا بياخدوها

4- تركيب كاميرات مراقبة فى الاقسام فى كل مكان علشان نراقب الضباط بيعذبوا الناس جوه ،طبعا بهزر،علشان نراقب كل شئ واى انتهاكات ،بس بقى تسجيلات الكاميرات دى تبقى مع هيئة مستقلة عن الشرطة علشان منسمعش ان ارشيف التسجيلات حصل فيه ماس كهربائى

5- نشر دوريات راكبة فى كل منطقة علشان توصل بسرعة فى حالة حدوث اى جريمة وتطوير سيارات الشرطة والغاء البوكس ،نستبدله بسيارات بها شبكة خلف المقاعد الامامية

6- سحب الاسلحة من قوات الشرطة اللى مش من المفروض تمسك سلاح زى المرور ،التسليح يكون مع القوات الضاربة فقط وبتوع المباحث بس بعد اعادة ـاهيلهم نفسيا بانهم مايضربوش نار على اى بشر يكلمهم

7- الزام كل رجال الشرطة بانهم يعلقوا بادج غير قابل للتزوير على الزى اللى لابسينه علشان الناس تعرفهم ،مادام مش بيحبوا يطلعوا كارنيهاتهم للناس

8- اى ضابط يستعمل سلطته خارج نطاق عمله ،يعامل كمواطن عادى وياخد بالجزمة

9- عزل مباحث وزارة المالية ،زى مباحث الضرائب والتأمينات او مباحث اى وزارة عن الداخلية لان دول مهمتهم استقصائية مش ضبطية 

10- اقالة رؤوس الفساد فى الشرطة فورا ومحاكمتهم  على غرار تجربة جورجيا ،والفاسدين الصغيرين يتم معقابتهم اداريا وتوجيه انذارات لهم بحيث لو عملوا حاجة تانى يتسجنوا ،علشان مش هنقدر نسجن الداخلية كلها 

11- جعل الزنانزين منفصلة عن بعضها فى الاقسام وبها تواليت وحوض علشان تفادى تفريخ  مجرمين لما واحد عادى يتسجن فى الزنزانة مع مجرمين ،انا هنا بتكلم عن زنازين الحجز فى الاقسام

12- زنازين السجون عايزة تتهد وتتبنى من تانى مع مراعاة انها تكون بعيدة عن العمران علشان فى حالة هروب حد يبقى من السهل كشفه وتتبعه ،وطبعا لازم كاميرات فى السجون وتفتيش مستمر من هيئات مستقلة قضائية وحقوقية

13- انشاء هيئة مستقلة عن الشرطة لتلقى شكاوى المواطنين  عن الشرطة او اى انتهاكات للداخلية ضد الافراد على ان يكون تحركها سريع وتحقيقاتها تحال للقضاء مباشرة دون المرور على النيابة

14- انشاء معمل جنائى  لكل منطقة على ان يخضع لاشراف هيئة قضائية ملهاش شغلانة غير مراقبته وامداد المعامل دى باخصائيين فى مختلف المجالات -اطباء ،كيميائيين ،خبراء سلاح ...الخ وامدادها بالاجهزة الحديثة المتخصصةفى البحث الجنائى 

15- دعم مديريات الامن باطباء نفسيين متخصصين للتقيم الدورى النفسى لرجال الشرطة على الا تجدد كارنيهات ضباط الشرطة الا بعد اجتيازهم بنجاح للتقييم النفسى

4- الضريبة التصاعدية :

مش معقول كل الشرائح تدفع ضرائب زى بعض ،الشريحة الضريبية حسب الدخل والارباح واعادة الضريبة العقارية للتفعيل مرة اخرى ،دا دى الحاجة الوحيدة اللى عملها بطرس غالى لصالح الناس بس عايزة تعديلات منها ان العقار محل السكن لا يخضع للضريبة لانه لا يعتبر استمرار

5- تسهيل المشروعات الصغيرة :

نسبة البطالة فى البلد كبيرة وعلشان تاخد ارض تعمل عليها ورشة صغيرة بتتكلف اكتر من ربع مليون جنيه ودا عن تجربة ،مش معقول الحرامية ياخدوا الارض بنص جنيه والشباب يدفع المبلغ الخرافى ده عشان يعمل ورشة صغيرة،اعطوا الارض للشباب وسهلولهم الاجراءات وخفوا الرشاوى .

6- الصندوق الاجتماعى :

الصندوق بيشترط ان يمول شركات ومشاريع قائمة بالفعل ،طيب ازاى ،انا عايز اعمل مشروع ،انت تشترط انه يكون قائم علشان تموله ،يجب فتح النار على اموال الصندوق المهدرة

7- الدعم :

دعم السلع الغذائية يكاد يكون معدوم الان ، يجب التركيز على ان تنال كل العائلات محدودة الدخل حصة من الطعام تشمل اللحوم والدواجن وغيرها من السلع الغذائية الضرورية بدعم كامل .

8- ماسبيرو:

تغيير كل قيادات ماسبيرو ولو اعدموهم يبقى احسن علشان مايروحوش فى اماكن تانية يقرفونا فيها ،واطلاق حرية الاعلام بدون رقابة مع محاسبة اى جهة اعلامية تروج لاخبار كاذبة او تسئ لسمعة اى شخص بدون ادلة دامغة

9- الصحة :

من حق كل مواطن انه يتلقى العلاج اللازم فى اى وقت سواء غنى او فقير ،بس الغنى هيدفع ضرايب اكتر ،المستشفيات تتطور /مش حتى الشاش والقطن على حساب المريض والدم اللى وزارة الصحة بتاخدوا تبرعات متروحش تبيعه للمرضى ،زى ما اتبرعنا بيه ،المرضى لازم ياخدوه ببلاش برضو ،مش وزارة الصحة تاخد تمن دمنا فى جيوبها

الارتفاع بمستوى الاطباء والممرضين وزيادة اجورهم ،وممكن نعمل تقييم دورى لاداء الاطباء والممرضين يتم على اساسه ترقيتهم دون الالتفاف لعامل السن ،يعنى ننسى شوية موضوع الاقدمية ده اللى ودانا فى داهية ،الترقية على اساس الكفاءة فى العمل .

دى الافكار اللى فى دماغى دلوقتى ،ولو فى فكرة تانية ظهرت هاضيفها